आपत्कालीन परिस्थितीत एकाच क्रमांकावर मिळणार त्वरित मदत; सोलापूर ग्रामीण पोलिसांचे ‘डायल ११२’ वापराबाबत आवाहन

नौशाद मुलाणी संपादक Times 9 Marathi News Network

सोलापूर: सामान्य नागरिकांच्या सुरक्षिततेसाठी आणि कोणत्याही आपत्कालीन परिस्थितीत तात्काळ व प्रभावी पोलीस मदत मिळवून देण्यासाठी ‘डायल ११२’ (Emergency Response Support System – ERSS) ही अत्याधुनिक सेवा सोलापूर ग्रामीण पोलीस दलामार्फत प्रभावीपणे राबवली जात आहे. जिल्ह्यातील नागरिकांनी संकटाच्या प्रसंगी त्वरित ‘११२’ या क्रमांकावर संपर्क साधून मदत मिळवावी, असे आवाहन सोलापूर ग्रामीणचे पोलीस अधीक्षक अतुल कुलकर्णी यांनी केले आहे.
मा. सर्वोच्च न्यायालयाच्या निर्देशानुसार राज्यभरात ही सेवा कार्यान्वित करण्यात आली आहे. आधुनिक तंत्रज्ञानाच्या माध्यमातून नागरिकांच्या जीवित व मालमत्तेचे संरक्षण करणे आणि कमीत कमी वेळेत मदत पोहोचवणे हा या यंत्रणेचा मुख्य उद्देश आहे.

‘डायल ११२’ सेवा नेमकी काय आहे?
‘डायल ११२’ ही संपूर्ण देशभरासाठी एकीकृत आपत्कालीन प्रतिसाद सेवा आहे. या एकाच क्रमांकावरून पोलीस, अग्निशमन दल आणि रुग्णवाहिका या तिन्ही अत्यावश्यक सेवांची मदत मिळते. कोणत्याही मोबाईल किंवा लँडलाईनवरून हा क्रमांक विनामूल्य (Free) डायल करता येतो.

कोणत्या प्रसंगी ‘११२’ वर संपर्क साधावा?
चोरी, दरोडा, घरफोडी किंवा संशयास्पद हालचाली दिसून आल्यास.
महिलांवरील अत्याचार, छेडछाड किंवा कौटुंबिक हिंसाचार.
रस्ते अपघात, जखमी व्यक्ती किंवा तातडीची वैद्यकीय मदत.
मारामारी, भांडणे किंवा कायदा व सुव्यवस्था बिघडण्याची शक्यता असल्यास.आग, नैसर्गिक आपत्ती किंवा इतर आणीबाणीच्या घटना.
हरवलेली व्यक्ती, ज्येष्ठ नागरिक अथवा बालकांबाबत तातडीची मदत.
जीवित किंवा मालमत्तेला धोका निर्माण करणारी कोणतीही परिस्थिती.

या सेवेची प्रमुख वैशिष्ट्ये:
२४x७ सेवा: २४ तास अखंड कार्यरत नियंत्रण कक्ष.
जीपीएस तंत्रज्ञान: कॉल प्राप्त होताच जीपीएसच्या (GPS) मदतीने घटनास्थळाच्या सर्वात जवळ असलेल्या पोलीस वाहनाला त्वरित माहिती पाठवून कमीत कमी वेळेत मदत पोहचवली जाते.

विशेष सुरक्षा: महिलांच्या सुरक्षिततेसाठी विशेष प्रतिसादाची यंत्रणा उपलब्ध.
‘112 India’ मोबाईल अ‍ॅपचा वापर करा
नागरिकांनी आपल्या स्मार्टफोमध्ये ‘112 India’ हे अधिकृत अ‍ॅप डाउनलोड करून नोंदणी करावी. या अ‍ॅपमध्ये ‘SOS बटन’, ‘Live Location Sharing’ आणि ‘Emergency Contacts’ यांसारख्या अत्यंत महत्त्वाच्या सुविधा उपलब्ध आहेत. विशेषतः महिला, ज्येष्ठ नागरिक, विद्यार्थी आणि एकट्याने प्रवास करणाऱ्या नागरिकांसाठी हे अ‍ॅप अत्यंत उपयुक्त आहे.

नागरिकांनी घ्यावयाची काळजी:
केवळ वास्तविक व गंभीर आपत्कालीन परिस्थितीतच ‘११२’ वर कॉल करावा.
विनाकारण कॉल करणे किंवा खोटी माहिती देणे टाळावे.
कॉल करताना घटनेचे स्थान, परिसर आणि परिस्थितीची स्पष्ट माहिती द्यावी.

“आपत्कालीन परिस्थितीत एकच क्रमांक, तत्पर मदत – डायल ११२. नागरिकांनी या सेवेचा जबाबदारीने वापर करून स्वतःच्या व इतरांच्या सुरक्षिततेसाठी सहकार्य करावे.”
— अतुल कुलकर्णी (पोलीस अधीक्षक, सोलापूर ग्रामीण)