डिजिटल मीडिया संपादक पत्रकार संघटनेचे गोव्यात राष्ट्रीय महाअधिवेशन संपन्न; ‘अभिव्यक्ती स्वातंत्र्या’वर ॲड. संदिप कागदे यांचे अभ्यासपूर्ण व्याख्यान
नौशाद मुलाणी संपादक Times 9 Marathi News Network
पणजी (गोवा): डिजिटल मीडिया संपादक पत्रकार संघटनेच्या वतीने पणजी येथील प्रसिद्ध कला अकादमीमध्ये तिसऱ्या राष्ट्रीय महाअधिवेशनाचे दिमाखात आयोजन करण्यात आले होते. या अधिवेशनात ‘अभिव्यक्ती स्वातंत्र्याचे संविधानिक स्वरूप’ (Constitutional Perspective of Freedom of Speech and Expression) या विषयावर बोलताना प्रसिद्ध कायदेतज्ज्ञ ॲड. संदिप कागदे यांनी पत्रकार आणि उपस्थितांना सखोल मार्गदर्शन केले.
या महाअधिवेशनाचे उद्घाटन गोव्याचे मुख्यमंत्री डॉ. प्रमोद सावंत यांच्या हस्ते दीपप्रज्वलन करून करण्यात आले. याप्रसंगी महाराष्ट्र राज्याचे उद्योगमंत्री उदय सामंत, गोव्याचे समाजकल्याण मंत्री सुभाष फळदेसाई, पणजीचे खासदार सदानंद शेठ तानावडे, संघटनेचे महाराष्ट्र प्रदेशाध्यक्ष सतीश सावंत, गोवा प्रदेशाध्यक्ष अनिल पाटील, सोलापूर जिल्हाध्यक्ष सचिन कुलकर्णी यांसह अनेक मान्यवर व्यासपीठावर उपस्थित होते.
अधिवेशनाच्या विशेष सत्रात ॲड. संदिप कागदे यांनी भारतीय राज्यघटनेतील कलमे आणि लोकशाहीतील अभिव्यक्ती स्वातंत्र्याचे महत्त्व विशद केले. त्यांनी प्रामुख्याने खालील मुद्द्यांवर प्रकाश टाकला
भारतीय राज्यघटनेने दिलेले मूलभूत अधिकार.
अभिव्यक्ती स्वातंत्र्याचा अधिकार आणि त्यावरील घटनात्मक निर्बंध.वैयक्तिक जीवनाचा अधिकार (Right to Privacy) आणि प्रसारमाध्यमांची जबाबदारी.डिजिटल मीडियाच्या युगात अभिव्यक्ती स्वातंत्र्याची बदलती स्वरूपे.
त्यांचे हे व्याख्यान अत्यंत अभ्यासपूर्ण आणि माहितीपूर्ण ठरल्याने उपस्थित संपादक व पत्रकार बांधवांनी त्यास दाद दिली.
व्याख्यानानंतर खासदार सदानंद शेठ तानावडे यांच्या हस्ते ॲड. संदिप कागदे यांचा सन्मान चिन्ह, शाल आणि गुलाब पुष्प देऊन विशेष सत्कार करण्यात आला.
या महाअधिवेशनासाठी महाराष्ट्र, गोवा आणि इतर राज्यांतून संपादक व पत्रकार मोठ्या संख्येने उपस्थित होते. डिजिटल मीडियाच्या भविष्यातील आव्हानांवर आणि पत्रकारांच्या हक्कांवर या अधिवेशनात सकारात्मक चर्चा करण्यात आली.
