सावधान! तुम्ही खात असलेले अन्न सुरक्षित आहे का? सोलापूर FDA ची माळशिरस आणि अकलुजमध्ये धडक कारवाई!
नौशाद मुलाणी संपादक Times 9 Marathi News Network
सोलापूर जिल्ह्यातील अन्न व औषध प्रशासन (FDA) कार्यालयाने अन्न सुरक्षेच्या नियमांचे उल्लंघन करणाऱ्यांवर मोठी कारवाई केली आहे. माळशिरस तालुक्यातील एका दूध डेअरीचा परवाना नसतानाही अनधिकृतपणे व्यवसाय सुरू ठेवल्याने ती तात्काळ बंद करण्याचे आदेश देण्यात आले आहेत. तसेच अकलुज येथील एका पेढीवर छापा टाकून संशयास्पद दर्जाचे तब्बल २ लाख ४४ हजार ७०० रुपये किमतीचे पामोलिन तेल जप्त करण्यात आले आहे. या धडक कारवाईमुळे विनापरवाना आणि भेसळयुक्त अन्नपदार्थ विक्रेत्यांचे धाबे दणाणले आहेत.
अन्न व औषध प्रशासन सोलापूर कार्यालयाचे अन्न सुरक्षा अधिकारी मंगेश लवटे यांनी आज (दिनांक ३०/०५/२०२६) ‘मे. जय हनुमान भाईनाथ दूध संकलन व शितकरण केंद्र’ (पंडरपूर-पुणे रोड, ईकोबोर्डच्या समोर, मु. पिसेवाडी, पो. वेळापूर, ता. माळशिरस, जि. सोलापूर) या डेअरीवर प्रत्यक्ष कारवाई केली.
या डेअरीचे मालक गणेश काळे पाटील यांना प्रशासनाकडून वारंवार सूचना देण्यात आल्या होत्या. तरीही त्यांनी अन्न व औषध प्रशासनाचा आवश्यक परवाना न घेता अनधिकृतपणे व्यवसाय सुरू ठेवल्याचे निष्पन्न झाले. याशिवाय, अन्न सुरक्षा कायदा २००६ अंतर्गत सुरक्षित अन्न पुरवण्याबाबतच्या बहुतांश नियमांचे व तरतुदींचे उल्लंघन या डेअरीने केल्याचे आढळून आले. त्यामुळे अन्न व औषध प्रशासन सोलापूर यांनी या डेअरीला आपला व्यवसाय तात्काळ बंद करण्याचे कडक निर्देश दिले आहेत.
दुसऱ्या एका मोठ्या कारवाईत, अन्न सुरक्षा अधिकारी मंगेश लवटे यांनी अकलुजमधील ‘मे. जयकुमार दुलचंद दोषी’ (मु. पो. अकलुज, ता. माळशिरस, जि. सोलापूर) या पेढीची कसून तपासणी केली.
या तपासणीदरम्यान पेढीतील पामोलिन तेलाचा नमुना घेण्यात आला. सदर तेलाचा दर्जा कमी (सब-स्टँडर्ड) असणे किंवा लेबल दोष असल्याच्या संशयावरून तेथील तब्बल ९१७ किलो पामोलिन तेलाचा साठा जप्त करण्यात आला आहे. जप्त केलेल्या या साठ्याची किंमत २,४४,७००/- रुपये असून, पुढील आदेश येईपर्यंत हा साठा विक्रेत्याच्याच ताब्यात सुरक्षित ठेवण्यात आला आहे.
अधिकाऱ्यांचे आवाहन: परवाना आवश्यक, अन्यथा कारवाई
”सर्व अन्न व्यावसायिकांनी अन्न व औषध प्रशासनाची अधिकृत नोंदणी किंवा परवाना घेऊनच आपला व्यवसाय सुरू ठेवावा. नागरिकांना सुरक्षित व निर्भेळ अन्न पदार्थांचा पुरवठा होण्याच्या दृष्टीने अन्न सुरक्षा कायदा २००६ अंतर्गत सर्व तरतुदींचे पालन करणे बंधनकारक आहे,” असे आवाहन सहाय्यक आयुक्त साहेबराव देसाई, सहाय्यक आयुक्त सुनिल जित्तुरकर व अन्न सुरक्षा अधिकारी मंगेश लवटे यांनी केले आहे.
नागरिकांसाठी हेल्पलाईन!
सुरक्षित व निर्भेळ अन्नपदार्थांच्या पुरवठ्याबाबत किंवा अन्नपदार्थांमधील भेसळीबाबत नागरिकांच्या काही तक्रारी असल्यास, त्यांनी तात्काळ ९४०५५९६३४० या क्रमांकावर किंवा fdasolapur@gmail.com या ईमेलवर संपर्क साधावा, असे आवाहन अन्न सुरक्षा अधिकारी श्री. मंगेश लवटे यांनी केले आहे.
