बारामतीत ५ लाखांची लाच घेताना पोलीस हवालदार महेश उगले रंगेहात अटक; एसीबीची धडक कारवाई
इंदापूर प्रतिनिधी समीर शेख Times 9 Marathi News Network
बारामती (पुणे):तक्रारीवर कारवाई न करण्यासाठी तब्बल ५ लाख रुपयांची भरघोस लाच स्वीकारणाऱ्या बारामती तालुका पोलीस ठाण्यातील पोलीस हवालदार महेश अंकुश उगले याला लाचलुचपत प्रतिबंधक विभागाने (ACB) रंगेहात पकडले आहे. ही धडक कारवाई ८ सप्टेंबर २०२६ रोजी बारामती शहरातील माळेगाव रोड परिसरात करण्यात आली. या घटनेमुळे बारामतीसह संपूर्ण पुणे जिल्हा पोलीस दलात प्रचंड खळबळ उडाली आहे.
बारामती शहरात एका दाम्पत्याचा संयुक्तपणे ‘झुंबा डान्स क्लास’ आणि ‘जिम’ (Gym) चा व्यवसाय सुरू आहे. या क्लास आणि जिममुळे स्थानिक रहिवाशांना त्रास होत असल्याची एक तक्रार बारामती तालुका पोलीस ठाण्यात दाखल झाली होती.
या तक्रारीचा आधार घेत, संबंधित डान्स क्लास व जिमवर कायदेशीर कारवाई न करण्यासाठी आणि प्रकरण मिटवण्यासाठी पोलीस हवालदार महेश उगले यानेClass चालकांकडे सुरुवातीला ७ लाख रुपयांच्या लाचेची मागणी केली होती. त्यानंतर झालेल्या तडजोडीअंती ५ लाख रुपये देण्याचे ठरले.
तक्रारदाराची लाच देण्याची इच्छा नसल्याने त्यांनी या प्रकाराबाबत तात्काळ लाचलुचपत प्रतिबंधक विभाग (पुणे) कडे अधिकृत तक्रार नोंदवली. प्राप्त तक्रारीची पडताळणी केल्यानंतर एसीबीच्या पथकाने ८ सप्टेंबर २०२६ रोजी बारामती शहरातील माळेगाव रोड परिसरात तत्परतेने सापळा रचला.
ठरल्याप्रमाणे ५ लाख रुपयांची लाच स्वीकारताना हवालदार महेश उगले याला एसीबीच्या पथकाने घटनास्थळीच रंगेहात ताब्यात घेतले.
या प्रकरणी आरोपी पोलीस हवालदारावर भ्रष्टाचार प्रतिबंधक कायद्यान्वये गुन्हा दाखल करण्याची प्रक्रिया सुरू असून, पुणे एसीबीचे पथक पुढील अधिक तपास करत आहे. पोलीस खात्यातीलच कर्मचाऱ्यावर एवढ्या मोठ्या रकमेच्या लाचप्रकरणी कारवाई झाल्याने नागरिकांमधून आश्चर्य व्यक्त केले जात आहे.
