बारामती पोटनिवडणूक: पार्थ पवारांचा काँग्रेसवर प्रहार, तर शरद पवारांनी टोलावली ‘परिपक्वते’ची चेंडू!
नौशाद मुलाणी संपादक Times 9 Marathi News Network
पुणे/दिल्ली: अजित पवार यांच्या निधनामुळे रिक्त झालेल्या बारामती विधानसभा मतदारसंघाच्या पोटनिवडणुकीने राज्याचे राजकीय वातावरण चांगलेच तापले आहे. ही निवडणूक बिनविरोध व्हावी यासाठी महायुतीकडून प्रयत्न होत असतानाच, काँग्रेसने आपला उमेदवार रिंगणात उतरवल्याने आता या निवडणुकीत रंगत आली आहे. याच मुद्द्यावरून पार्थ पवार यांची आक्रमकता आणि शरद पवार यांनी त्यांना दिलेला संयमी सल्ला सध्या चर्चेचा केंद्रबिंदू ठरला आहे.
महायुतीकडून सुनेत्रा पवार यांना उमेदवारी देण्यात आल्यानंतर ही निवडणूक बिनविरोध होईल अशी चर्चा होती. मात्र, काँग्रेसने अशोक मोरे यांना अधिकृत उमेदवारी जाहीर केल्यामुळे पार्थ पवार यांनी तीव्र संताप व्यक्त केला आहे.
पार्थ पवार म्हणाले की, निवडणूक बिनविरोध करण्याबाबत कोणाशीही चर्चा झालेली नाही. काँग्रेस जे काही करत आहे, त्याचे काय परिणाम होतील हे लवकरच महाराष्ट्र बघेल. “राज्यात काँग्रेसचा जो ऱ्हास (Downfall) सुरू आहे, त्याचे मला वाईट वाटते,” अशा शब्दांत त्यांनी टीका केली.आपण कोणालाही पाठिंब्यासाठी विनवणी करणार नाही, नशिबात जे असेल ते होईल, असे म्हणत त्यांनी लढण्याचा निर्धार व्यक्त केला.
दुसरीकडे, दिल्लीत राज्यसभेच्या सदस्यत्वाची शपथ घेतल्यानंतर ज्येष्ठ नेते शरद पवार यांनी पार्थ पवारांच्या विधानांचा समाचार घेतला. पार्थ यांच्या आक्रमकतेबद्दल विचारले असता, त्यांनी आपल्या खास शैलीत उत्तर दिले.
”राजकारणात भाष्य करण्यासाठी एका विशिष्ट परिपक्वतेची गरज असते. सध्या त्यांच्याकडे ती कितपत आहे, हे मी आताच सांगू शकत नाही.” लोकशाहीत प्रत्येक पक्षाला आपला उमेदवार उभा करण्याचा अधिकार आहे. निवडणूक बिनविरोधच व्हावी, अशी मागणी करणे लोकशाहीत योग्य नाही.काँग्रेसने स्वतंत्र पक्ष म्हणून घेतलेला निर्णय योग्य असून त्यावर चर्चा करण्याची गरज नाही. सुनेत्रा पवार यांच्या प्रचाराबाबत विचारले असता, “आम्ही त्यांच्या विरोधात उमेदवार दिलेला नाही,” असे मोजके पण अर्थपूर्ण उत्तर देऊन त्यांनी आपली भूमिका स्पष्ट केली.
बारामतीमधील ही पोटनिवडणूक केवळ एका जागेसाठी नसून ती पवार घराण्यातील दोन पिढ्यांमधील वैचारिक फरकाचे दर्शन घडवणारी ठरत आहे. एकीकडे पार्थ पवार यांची भावनिक आक्रमकता दिसून येत आहे, तर दुसरीकडे शरद पवार यांनी लोकशाही मूल्यांची आणि राजकीय प्रगल्भतेची आठवण करून दिली आहे.
काँग्रेसच्या या निर्णयामुळे आता बारामतीत तिरंगी किंवा चुरशीची लढत होण्याची शक्यता निर्माण झाली असून, संपूर्ण महाराष्ट्राचे लक्ष या निकालाकडे लागले आहे.
