अकलूजकरांसाठी महत्त्वाची बातमी: वीर धरणातील पाणी टंचाईमुळे १५ जुलैपर्यंत पाणी जपून वापरण्याचे नगरपरिषदेचे आवाहन!
नौशाद मुलाणी संपादक Times 9 Marathi News Network
अकलूज:अकलूज नगरपरिषद कार्यक्षेत्रातील सर्व नागरिकांसाठी एक अत्यंत महत्त्वाची आणि सतर्कतेची बातमी आहे. अकलूज शहराला पाणीपुरवठा करणाऱ्या वीर धरणामध्ये सध्या अत्यंत अल्प पाणीसाठा उपलब्ध आहे. त्यामुळे नगरपरिषदेच्या मुख्य साठवण तलावात सध्या पाणी उपलब्ध होऊ शकलेले नाही.
या परिस्थितीवर मात करण्यासाठी अकलूज नगरपरिषदेने पाटबंधारे विभागाकडे दिनांक २३ जून २०२६ रोजीच पाण्याचा प्रस्ताव पाठवला आहे. पाटबंधारे विभागाकडून मिळालेल्या माहितीनुसार, येत्या १२ जुलै २०२६ रोजी धरणातून पाणी सोडण्यात येणार असून, १५ जुलै २०२६ पर्यंत हे पाणी अकलूज नगरपरिषदेच्या साठवण तलावात उपलब्ध होईल.
🚰 पाणी टंचाईवर मात करण्यासाठी नगरपरिषदेचे आपत्कालीन नियोजन
नागरिकांची गैरसोय होऊ नये म्हणून नगरपरिषदेने तात्काळ पर्यायी व्यवस्था युद्धपातळीवर सुरू केली आहे
३४ बोअरवेल सुरू: नगरपरिषदेच्या अखत्यारीतील एकूण ४६ बोअरवेलपैकी सध्या ३४ चालू बोअरवेलद्वारे सार्वजनिक कनेक्शनवरून पाणीपुरवठा केला जात आहे.
१० टँकरद्वारे पाणीपुरवठा: ज्या भागात बोअरवेलची सुविधा नाही, अशा ठिकाणी नगरपरिषदेमार्फत १० विशेष टँकरद्वारे पाणी पोहोचवले जाणार आहे.
मुख्याधिकाऱ्यांचे आवाहन:
“शहरातील प्रत्येक नागरिकाला पाणी मिळेल याची पूर्ण खबरदारी नगरपरिषद घेत आहे. मात्र, परिस्थितीचे गांभीर्य ओळखून सर्व नागरिकांनी उपलब्ध पाणी अत्यंत काटकसरीने वापरावे आणि नगरपरिषदेला सहकार्य करावे.” — सचिन पाटील (मुख्याधिकारी गट-अ, निवडश्रेणी, अकलूज नगरपरिषद)
