Times 9 Marathi News Network
अकलूज: माळशिरस तालुक्यातील राजकीयदृष्ट्या संवेदनशील असलेल्या अकलूज शहरात भारतीय जनता पार्टीच्या स्थानिक संघटनेत सध्या अंतर्गत मतभेदांची मोठी चर्चा रंगली आहे. पक्षाच्या विविध कार्यक्रमांमधील अनुपस्थिती आणि सोशल मीडियावरील ‘वॉर’मुळे भाजपमध्ये दोन गट सक्रिय असल्याचे चित्र स्पष्ट होत असून, याचा फटका पक्षसंघटनेला बसण्याची शक्यता वर्तवली जात आहे.
नेतृत्वातील समन्वयाचा अभाव
पक्षाच्या संघटनात्मक पातळीवर अकलूज मंडलाध्यक्ष सुजय माने पाटील आणि अकलूज शहराध्यक्ष महादेव कावळे यांच्या नेतृत्वाखाली स्वतंत्र हालचाली होत असल्याचे दिसून येत आहे. निवडणुकांनंतर दोन्ही नेत्यांच्या समर्थकांमध्ये समन्वयाचा अभाव असून, अनेक महत्त्वाच्या कार्यक्रमांत दोन्ही गट वेगवेगळे दिसून येत आहेत. शिस्तप्रिय मानल्या जाणाऱ्या भाजपमध्ये अशा प्रकारे उघडपणे दोन गट पडल्याने राजकीय वर्तुळात आश्चर्य व्यक्त होत आहे.
सोशल मीडियावरून ‘युवा’ संघर्ष चव्हाट्यावर केवळ वरिष्ठ पदाधिकारीच नव्हे, तर युवा कार्यकर्त्यांमध्येही दोन स्पष्ट प्रवाह दिसून येत आहेत. एकीकडे भाजपचे नवनिर्वाचित नगरसेवक राहुल लोंढे तर दुसरीकडे नगरसेवक महेश शिंदे यांच्या समर्थकांकडून सोशल मीडियावर होत असलेली पोस्टबाजी सध्या चर्चेचा विषय ठरत आहे.
एका गटाने पोस्ट टाकल्यानंतर दुसऱ्या गटाकडून लगेच प्रत्युत्तर दिले जाते.डिजिटल प्लॅटफॉर्मवर सुरू असलेल्या या स्पर्धेमुळे अंतर्गत मतभेद अधिक गडद होत असल्याचे कार्यकर्त्यांचे म्हणणे आहे.
विकासकामांच्या चर्चेला गटबाजीचे ग्रहण? माळशिरस तालुक्याचे माजी आमदार रामभाऊ सातपुते यांच्या नेतृत्वाखाली भाजपने या भागात मोठ्या प्रमाणावर विकासकामे आणि संघटनबांधणी केली आहे. सध्या भाजपच्या नगरसेवकांच्या कामाचे कौतुक सर्वत्र होत असतानाच, दुसरीकडे सुरू असलेल्या या गटबाजीमुळे कार्यकर्त्यांमध्ये नाराजीचा सूर आहे. “पक्षाची ताकद टिकवण्यासाठी स्थानिक पातळीवरील हे मतभेद तातडीने मिटणे आवश्यक आहे,” असे मत निष्ठावान कार्यकर्त्यांकडून व्यक्त केले जात आहे.
राजकीय जाणकारांच्या मते, जर हे अंतर्गत मतभेद लवकर मिटले नाहीत, तर याचा फायदा विरोधी पक्षांकडून घेतला जाऊ शकतो. गटबाजीमुळे कार्यकर्त्यांमध्ये मरगळ येऊन भविष्यात पक्षफुटीची किंवा गळतीची शक्यताही नाकारता येत नाही. याचा थेट परिणाम आगामी सामाजिक आणि संघटनात्मक कामांवर होण्याची भीती व्यक्त होत आहे.
भाजपने अकलूजमध्ये विकासकामांच्या जोरावर जनतेचा विश्वास जिंकला आहे. त्यामुळे पदाधिकाऱ्यांनी वैयक्तिक हेवेदावे बाजूला ठेवून समन्वयाने काम करावे आणि जनतेच्या प्रश्नांना प्राधान्य द्यावे, अशी रास्त अपेक्षा अकलूजमधील नागरिक व्यक्त करत आहेत.
अकलूज भाजपमधील ही गटबाजी केवळ चर्चेपुरती मर्यादित राहिलेली नाही, तर आता त्याचे रूपांतर संघर्षात होताना दिसत आहे. स्थानिक पातळीवर सुजय माने पाटील आणि महादेव कावळे यांच्यातील समन्वयाचा अभाव, तसेच युवा फळीतील राहुल लोंढे व महेश शिंदे यांच्या समर्थकांमधील सोशल मीडिया युद्ध यामुळे सामान्य कार्यकर्ता गोंधळलेल्या अवस्थेत आहे.
अंतर्गत वादाला कंटाळून निष्ठावान कार्यकर्ते सक्रिय राजकारणातून बाजूला होऊ शकतात किंवा इतर पर्यायांचा विचार करू शकतात.
भाजपमधील या फुटीचा फायदा नक्कीच विरोधी पक्षाला होऊ शकतो. पक्षांतर्गत विसंवाद असाच राहिला, तर आगामी काळात भाजपच्या बालेकिल्ल्याला मोठे खिंडार पडण्याची शक्यता नाकारता येत नाही.
एकीकडे भाजप नगरसेवकांच्या विकासकामांची चर्चा आहे, मात्र संघटनात्मक फूट पडल्यास या कामांचे श्रेय घेण्यावरूनही वाद होऊ शकतात.थोडक्यात सांगायचे तर…
रामभाऊ सातपुते यांनी बांधलेली संघटनात्मक मोट जर स्थानिक नेत्यांनी अहंकारापोटी सैल केली, तर अकलूज भाजपमध्ये मोठी फूट पडणे अटळ आहे. ही गटबाजी वेळीच रोखली नाही, तर पक्षाचे मोठे नुकसान होऊन त्याचे रूपांतर ‘घरघर’ लागण्यात होऊ शकते, अशी भीती जाणकार व्यक्त करत आहेत.
