वेळापूर कन्या शाळेचे मुख्याध्यापक युन्नूस तांबोळी यांना ‘आदर्श मुख्याध्यापक’ पुरस्कार प्रदान
आमदार उत्तमराव जानकर यांच्या हस्ते गौरव; वेळापूर शाळेच्या नाविन्यपूर्ण उपक्रमांचे तालुक्यात कौतुक
Times 9 Marathi News Network
माळशिरस: माळशिरस तालुका पंचायत समिती शिक्षण विभागाच्या वतीने दिला जाणारा मानाचा ‘आदर्श मुख्याध्यापक पुरस्कार’ यंदा वेळापूर मुलींच्या शाळेचे मुख्याध्यापक युन्नूस तांबोळी यांना प्रदान करण्यात आला. आमदार उत्तमराव जानकर यांच्या शुभहस्ते आणि तालुक्यातील विविध मान्यवरांच्या उपस्थितीत हा गौरव सोहळा उत्साहात पार पडला.
या कार्यक्रमाला सभापती दत्ता (भैया) मगर, उपसभापती मनीषा पाटील, जिल्हा परिषद सदस्य मीनाक्षी सरतापे, गौतम माने, नागनाथ भोसले, सुषमा नारनवर, लिलावती ठवरे, पंचायत समिती सदस्य प्रवीण वाघमोडे, युवराज झजे, डॉ. स्नेहल जानकर, आनंद शेंडगे, महादेव साबळे, आप्पासाहेब पाटील, मनीषा नाईक-नवरे, नम्रता पुकळे, रेश्मा माने, माजी सभापती मच्छिंद्र ठवरे, मिलिंद सरतापे आणि गटशिक्षणाधिकारी सुषमा महामुनी यांच्यासह शिक्षण क्षेत्रातील मान्यवर उपस्थित होते.
मुख्याध्यापक युन्नूस तांबोळी यांच्या मार्गदर्शनाखाली वेळापूर मुलींच्या शाळेने शैक्षणिक आणि सामाजिक क्षेत्रात उल्लेखनीय भरारी घेतली आहे. शाळेत राबवले जाणारे काही महत्त्वाचे उपक्रम खालीलप्रमाणे आहेत:
आर्थिकदृष्ट्या दुर्बल मुलींच्या शिक्षणाचा आणि आरोग्याचा संपूर्ण खर्च या योजनेद्वारे केला जातो.
भटक्या जमातीतील मुलींसाठी जन्माचे दाखले, आधार कार्ड आणि जातीचे दाखले मिळवून देण्यासाठी शाळेने विशेष पुढाकार घेतला आहे.
शाळेत सुसज्ज संगणक कक्ष उपलब्ध असून आधुनिक तंत्रज्ञानाद्वारे विद्यार्थिनींना अध्यापन केले जाते.
सलग ५ वर्षे तालुकास्तरीय लंगडी स्पर्धेत शाळेने प्रथम क्रमांक पटकावला आहे. तसेच शिष्यवृत्ती व विविध स्पर्धा परीक्षेत येथील विद्यार्थिनींनी घवघवीत यश मिळवले आहे.
विद्यार्थिनींची उपस्थिती १००% राहावी यासाठी शिक्षक प्रत्यक्ष पालकांच्या भेटी घेऊन त्यांच्या समस्या सोडवत आहेत.
शाळेत ‘सायकल बँक’ आणि ‘बचत बँक’ यांसारखे उपक्रम यशस्वीपणे राबवले जात आहेत.
वाढदिवसाच्या निमित्ताने विद्यार्थिनी शाळेला पुस्तक भेट देतात, ज्यातून एक समृद्ध ग्रंथालय साकारले आहे.
समग्र शिक्षा अंतर्गत ‘राष्ट्रीय आविष्कार अभियान २०२५-२६’ साठी या शाळेतील तीन मुलींची निवड राज्यस्तरीय सहलीसाठी झाली आहे, ही तालुक्यासाठी अभिमानाची बाब ठरली आहे. रोटरी क्लब आणि द्वारकाधीश सामाजिक संस्थेसारख्या अनेक संस्थांच्या मदतीने शाळेचा कायापालट झाला आहे.
”शाळेतील गुणवत्तापूर्ण शिक्षण आणि राबवलेले विविध उपक्रम यामुळे शाळेचा पट सातत्याने वाढत आहे. हा पुरस्कार म्हणजे सर्व शिक्षक, पालक आणि विद्यार्थिनींच्या कष्टाचे फळ आहे.”— युन्नूस तांबोळी (आदर्श मुख्याध्यापक, वेळापूर)
या पुरस्काराबद्दल युन्नूस तांबोळी आणि वेळापूर कन्या शाळेच्या सर्व शिक्षक वृंदाचे सर्वत्र अभिनंदन होत आहे.
