आशेचा किरण! तुर्कस्तानमध्ये 100 तासांनंतरही ढिगाऱ्यातून जिवंत लोक बाहेर; इमोशनल करणारी घटना समोर
टाइम्स 9 मराठी न्यूज
भीषण भूकंपामुळे झालेल्या विध्वंसानंतर आता तुर्कस्तानमध्ये ढिगार्‍यांमध्ये जिवंत लोकांचा शोध सुरू असून 100 तासांहून अधिक काळ लोटल्यानंतरही लोक जिवंत सापडत आहेत.
तुर्कस्तानला झालेल्या जोरदार भूकंपाच्या 100 तासांनंतर, बचाव आणि मदत कर्मचार्‍यांनी ढिगाऱ्यातून काही लोकांना जिवंत बाहेर काढल्याने सुटकेचा नि:श्वास सोडला. 7.8 आणि 7.5 रिश्टर स्केलच्या दोन मोठ्या भूकंपांमुळे तुर्की आणि सीरियामध्ये प्रचंड विध्वंस झाला. यामध्ये 20 हजारांहून अधिक लोकांना आपला जीव गमवावा लागला. तुर्कस्तानच्या इस्केंडरुनमधील बचावकर्त्यांनी 101 तास ढिगाऱ्याखाली दबलेल्या सहा जणांना शुक्रवारी सकाळी जिवंत बाहेर काढले. शोध आणि बचाव कर्मचारी मुरत बेगुल यांनी सांगितले की, कोसळलेल्या इमारतीच्या आत उरलेल्या छोट्या जागेत एकत्र राहिल्याने सहा जणांना वाचण्यास मदत झाली, सहाही जण नातेवाईक आहेत.
या भूकंपात झालेल्या मृतांची संख्या जपानमधील फुकुशिमा येथे भूकंप आणि त्सुनामीमुळे झालेल्या जीवितहानीपेक्षा जास्त आहे. ढिगाऱ्याखालून मृतदेह बाहेर काढण्याचे काम अद्याप सुरू आहे, त्यामुळे मृतांचा आकडा वाढण्याची शक्यता आहे. काही दिवसांनंतर, भूकंपाचा केंद्रबिंदू असलेल्या गझियानटेप येथील इमारतीतून बचाव कर्मचार्‍यांनी 17 वर्षीय अदनान मुहम्मद कोर्कुटला जिवंत बाहेर काढले. 94 तास ढिगार्‍याखाली दबून तो स्वतःची लघवी पिऊन जिवंत राहिला. कोरकुट म्हणाले, ‘देवाचे आभारी आहे की तुम्ही (बचावकर्ते) आलात.’
