अकलुजमध्ये शिवजयंती मिरवणुकीत नियमांचे उल्लंघन; ११ मंडळांसह डीजे धारकांवर गुन्हे दाखल
टाईम्स 9 मराठी न्यूज नेटवर्क
अकलुज: शिवजयंती उत्सव २०२६ च्या मिरवणुकीत ध्वनी प्रदूषणाचे नियम धाब्यावर बसवून मोठ्या आवाजात डीजे आणि लेझर शो लावणाऱ्या ११ मंडळांवर आणि संबंधित डीजे धारकांवर अकलुज पोलिसांनी गुन्हे दाखल केले आहेत. प्रशासनाच्या आवाहनाकडे दुर्लक्ष करून शांततेचा भंग केल्याप्रप्रकरणी ही कडक कारवाई करण्यात आली आहे.
सोलापूर ग्रामीणचे पोलीस अधीक्षक अतुल कुलकर्णी आणि अपर पोलीस अधीक्षक प्रितम यावलकर यांनी मिरवणुकीपूर्वी बैठका घेऊन पारंपारिक वाद्यांचा वापर करण्याचे आवाहन केले होते. अकलुजचे उपविभागीय पोलीस अधिकारी संतोष वाळके आणि पोलीस निरीक्षक निरज उबाळे यांनीही स्थानिक मंडळांना नोटिसा बजावून ध्वनी प्रदूषण टाळण्याबाबत स्पष्ट सूचना दिल्या होत्या. मात्र, २० फेब्रुवारी रोजी झालेल्या मिरवणुकीत अनेक मंडळांनी या आदेशांचे उल्लंघन केल्याचे समोर आले.पोलिसांनी केलेल्या तपासणीत खालील मंडळांनी मर्यादेपेक्षा जास्त आवाज केल्याचे निष्पन्न झाले आहे:
कारवाई झालेली मंडळे आणि ध्वनी पातळी (डेसीबलमध्ये)
अ.क्र. मंडळाचे नाव ध्वनी पातळी (डेसीबल)
१) संभाजीराजे प्रतिष्ठान, अकलुज १२५ dB
२) रामरहिम प्रतिष्ठान, अकलुज ११८ dB
३) नवक्रांती प्रतिष्ठान, अकलुज ११७ dB
४) लहुजी साम्राज्य प्रतिष्ठान, अकलुज ११५ dB
५) स्वराज्य प्रतिष्ठान, यशवंतनगर ११२ dB
६) शिवदत्त प्रतिष्ठान, अकलुज ११० dB
७) शिवमुद्रा प्रतिष्ठान, अकलुज ११० dB
८) हिंदवी प्रतिष्ठान, अकलुज १०८ dB
९) महाराज प्रतिष्ठान, अकलुज १०७ dB
१०) सहयाद्री प्रतिष्ठान, अकलुज १०५ dB
११) छावा ग्रुप, अकलुज १०५ dB
जिल्हाधिकाऱ्यांच्या आदेशाचा अवमान केल्याप्रकरणी भारतीय न्याय संहिता २०२३, ध्वनी प्रदूषण अधिनियम २००० आणि पर्यावरण संरक्षण अधिनियमातील विविध कलमान्वये हे गुन्हे दाखल करण्यात आले आहेत. सार्वजनिक शांतता धोक्यात आणणाऱ्यांविरुद्ध ही मोहीम राबवण्यात आली असून पोलीस पुढील तपास करत आहेत.
महत्त्वाची टीप: प्रशासनाने सामाजिक उपक्रम राबवून उत्सव साजरा करण्याचे आवाहन केले होते, मात्र नियमांचे उल्लंघन करणाऱ्यांवर आता कायद्याचा बडगा उगारण्यात आला आहे.
