अनेक लग्नाळूंना फसवलं, पोलिसांनी बेड्या ठोकल्या, ९ महिन्यांची गर्भवती, प्रसुतीसाठी दवाखान्यात नेली अन् लघुशंकेच्या बहाण्याने झाली फरार

उपसंपादक——हुसेन मुलाणी
टाइम्स 9 मराठी न्युज नेटवर्क
मो. 9730 867 448

लग्न होत नसल्याने लग्नाळू तरुण मोर्चे काढत आहेत.
बेरोजगारी, गरिबी, शिक्षण, मुलींच्या वाढत्या अपेक्षा, मुलींचा घटता जन्मदर अशा कारणामुळे तरुणांची लग्न जमत नाहीयेत. अशा सगळ्या गंभीर वातावरणात बीड जिल्ह्यातून एक धक्कादायक प्रकार समोर आला आहे. लग्नाळू तरुणांची बनावट लग्न लावून फसवणूक करणाऱ्या टोळीची मास्टरमाईंड पूजा कचरू निलपत्रेवार पोलिसांना चकवा देऊन रुग्णालयातून गायब झाली आहे. प्रसुतीसाठी तिला बीड जिल्हा रुग्णालयात आणली होती. मात्र, त्याआधीच पोलिसांच्या हातावर तुरी देऊन सुरक्षेसाठी तैनात असलेल्या महिला अंमलदाराला चकवा देऊन आरोपी पूजा पळून गेल्याची धक्कादायक घटना समोर आली आहे.

काही दिवसांपूर्वी बीडमध्ये मोठ्या हौसेने आणलेली नवरी करवलीसह पळून जाण्याच्या प्रयत्नात असताना नवरदेवाने पकडून शहर पोलिसांच्या स्वाधीन केली होती. बनावट लग्न करुन पळून जाणारी टोळी यानिमित्ताने समोर आली होती. पोलिसांनीही हे प्रकरण गांभीर्याने घेतलं होतं. यानिमित्ताने बनावट लग्न करणाऱ्या टोळीचा पर्दाफाश झाला होता. तब्बल ११ आरोपींचा यात सहभाग होता. या केसमध्ये सध्या रुग्णालयातून पळून गेलेली पूजा हीच मुख्य आरोपी आहे.

याच केसमध्ये पूजा पोलिसांच्या ताब्यात होती. परंतु ९ महिन्यांची गर्भवती असल्याने तिला बीडच्या जिल्हा रुग्णालयात दाखल करण्यात आलं होतं. गेली २ दिवस पोलिसांच्या तावडीतून निसटण्याचा प्लॅन तिच्या डोक्यात सुरु होता. जिल्हा रुग्णालयात दाखल केल्यानंतर महिला पोलीस कर्मचाऱ्याचा डोळा चुकवून तिने तेथून पळ काढला.

पूजा बीड जिल्हा रुग्णालयातून कशी पळाली?

पोलिसांच्या ताब्यात असलेली पूजा गर्भवती असल्याने तिला बीड जिल्हा रुग्णालयात दाखल करण्यात आले होते. लघुशंकेला जाण्याचा बहाणा करून ती वॉशरुमकडे गेली. पोलिसांचं लक्ष चुकवून तिने तिथूनच पोबारा केला. अर्धा तास झालं तरी पूजा आली नसल्याने महिला पोलीस कर्मचाऱ्यांनी वॉशरुमकडे धाव घेतली. नंतर पूजाने पलायन केल्याचं त्यांच्या लक्षात आलं.

पोलिसांच्या हातावर तुरी देणारी पूजा लग्नाळू तरुणांच्या फसवणुकीचे गुन्हे करणारी सराईत आरोपी आहे. बीड शहर, नेकनूर, बैठाणा ठाण्यातील विविध गुन्ह्यात तिला पोलिसांनी बेड्याही ठोकल्या होत्या. औरंगाबादच्या पैठण पोलीस स्टेशनमध्ये तिच्यासह तिचा पती कचरूलाल तुळशीराम निलपत्रेवार याच्यावर गुन्हा नोंद आहे.